أخبار عاجلة
الرئيسية / مواهب / قصيدة ” حدوته ” بقلم..زينب ممدوح
(زينب ممدوح مؤلفة القصيدة)

قصيدة ” حدوته ” بقلم..زينب ممدوح

لو كان للحب قانون
نتجمع جوا صالون
والحد علي اللي يخون
او يكسر قلب زبون
إنما علشان ببلاش
مفهوش لا دولار ولا كاش
والكل يحب يصيع
ده محدش روميو يا بيه
خليتوا الحب وضيع
بقي كلمة ف بُق عيال
الحب ده عايز راجل مش اندر ايدج يا خال
ولا برضوا بنت غشيمة
يلزم للحب القيمة
مش كرسي ف اخر السيما!
اسلكوا للحب يا خلق
العك صبح للحلق
واتأنوا ف القرارات
كتر المسلسلات التركي ماتجبشي غير ضحكة حلوة ف وقتها بتمشي
كل الحبايب اللي وخدنهم مثل
وافقوا يدوقوا المر
ربك جازاهم عسل
كانت الشهامة ف دمهم
معروفة يعني
إن الوعود ع الحر دين
ديِن المحبة ..سلام
دَين الوعود ..تنفيذ
فكر البنات .. احلام
ربط الايدين .. تعجيز
فأياك تكون كلمة ..سكينتك التلمة جرحت رقاب البنية
ادي اخرة الطيبة كات هي دي الديه
عامل ممثل خايب
ماسك سكريبت ضعيف
ماخدتش م فرصتها نايب
والقصة مش محتاجة ضيف
طورت افكارك ..
ب أن انت بتحبها وان انت غير الكون
أكدت افكارك .. بمكالمة ف التليفون
لمحت ف عينها القلق
طمنتها بجملة
ست البنات افرحي ولا تخافيش م اليوم
الليلة جاي اقول
*هاتي رقم ماما*
والاتفاق بيكون مع بابا مش ماما !
ياما هيطلع م الموضات ياما
يا بنات يا غلبانة ..ازاي تأمنوا بموضة من يومها بطلانة !!
هيكمل التمثيل ويعيش ف دور الشهم
” ايوة هاجي انا وش رسمي”
لما اخلص جامعة بس
ثم بعد الجامعة جيش
ثم بعد الجيش منين !!
واتفقنا !؟ والخيال اللي عيشت فيه سنين !؟
مانتي عارفة البير يا حلوة كان غطاه ف ايدك سنين
ثم فركش ثم ننزل بالستارة
قد ايه المسرح كبير
قد ايه صعبة العبارة
النهاية
لازم تحترم الأصول
عمر يوم ماهترضي لاختك كسر خاطر أو شعور
ليه مصُر تبقي خايب!
والقرار علي حبل دايب
كات بتعدل فيك كتير والطباع ديما بتغلب
شايفة ديما رغم بخلك أن انت بني ادم كريم
والبخل مش بس بفلوس
البخل برضوا ف المشاعر ف النفوس
والعمر اللي سرقته منها مش هيتعوض فلوس
ولذلك نص الدستور ..
علي ان الحب ده هيكون
للي عمره ماكان بخيل
للي يحترم الولايا
واللي هيصنهم عزاز
وبناءََ علي نص الدستور
تمشي ترفع راسها بيك
تبقي وسط الناس أساس
واوعي لا تخيب ظنونها
حتي انفاسك تضيق لو مضيت اليوم بدونها

شاهد أيضاً

يسأل الزهرُ عن حبٍّ وعن دللٍ

بقلم _ هيفاء الأمين :-   لو مثّلوا الحسنَ أين الحسنُ من يارا . إن …

كشف الستار عن مجموعة من الفنانين التشكيليين بأعمار مختلفة يشاركون فى العديد من المسابقات والمعارض المتميزة

كتبت _ اسراء ابوالخير :-   تحت إشراف الدكتورة والفنانة التشكيلية رشا عبد الغفار امين …

الطالب “مصطفي محمود” موهوب بدرجة فنان

كتب _ احمد الجندي :-   الرسم هو أحد المواهب الفطرية التي يتميز بها إنسان …

” علاء حمدي ” يحصد المركز الأول في مسابقة نهضة مصر للتصوير الفوتوغرافي

كتبت – مروة حسن :-   فاز الأستاذ/ علاء حمدي عبده بالمركز الأول في مسابقة …

محمد نصر يتألق على خشبة مسرح الهوسابير

كتب _ محمد زكى :-   فى ظل الإحتفالات الفنية بأجازة عيد الأضحى إقيمت عرض …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *