أخبار عاجلة
الرئيسية / مواهب / ابويا..بقلم “زينب ممدوح”

ابويا..بقلم “زينب ممدوح”

المرض اللي ف جسم ابويا
والراقدة الماسكة ف جلابيته
ومعافرة كل يومين ف ازاي هينام فارد ضهره !
علشان يتنفس بسهوله
ويقولي الراقدة دي ملعونة
والواخد ع الشقي من صغره
م الصعب يحب قعاد البيت
انا راجل اخف ع رايحة الجاز
علي منظر ايدي من بعد الشغل
أنا بشقي من أولي إعدادي
أنا جايب جاز م القاعدة دي
رزقي ونصيبي ف دنيتي انتوا
شغلنلي بالي ف دعوتي ونومتي
والوقعة كبيرة المرادي
فوصيتي تكون لبعض ضهور
وإن جالك اخوك مكسور تداويه
كله هيتعوض م الدنيا
معروفه يابني مهيش دايمة
يا سمارة تعالي اقعدي جنبي
اسمعي كوبليه م اللي ف قلبي
” لك حق يا اسمر صحيح تمشي وتتعاجب
لكن تسوق الدلال يا ابو سمرة مش واجب
ضحيت عشانك كتير وبرضوا مش عاجب ” !!
يا صاحبي ده انت الوحيد اللي بتعجبني
خدني الكلام وياكي يابنتي
مريوم حببتي دي حافظة تلقمتي
نادوا الواد يوسف وتعالوا احكلكم
عن ماما زمان كانت يحرام عاملة مشاكل مع ابوها عشان تتجوزني
فترد امي وهي بتضحك
مش دي القصة
ده ابوكم ياما حايل فيا
وعنيه مليانة بحنيه
ووفقت ابويا علي قراره
بقي ابوكم بيري باسراره
وبقيتله عصايته وأفكاره
*ابويا*
اللي دابت كعوبه من السفر
قلبه اللي كان بيدفي سبعة
قلبه اللي كان بيمدنا بصبره
قلبه الكبير كان ربنا جبره
ياما شاف كتير
ياما داق كتير من أيامه
قلبه القوي ماكنش يهاب غير ربنا
ابويا كان مش زينا
ولا عمره اتأمر علي هدمة
ولا حتي اتبطر علي لقمة
كان شخص زاهد ف الحياة
أيوة صحيح بيحبنا
فاتح دراعه
طالب يقابل ربنا
لطفك يساعه
رحلك مخلص رحلته
يا صبر ابويا علي المرض
كان فيه اللي فيه
من صبره كان يكتم وجيعته جوا منه
وان حمله زاد يرميه ورا منه
صعبان عليا رقدتك
لكن حكمة ربنا ف الجولة دي انك هتكسب اخرتك
شوف يا بابا
كل التعازي سمعتها
ومفيش كلام بيعزيني
وجع فراقك علي عيني
بطلب يارب تعزيني
خدت العزيز عندي
لكنه مايعزش
كُنلي الحبيب بعده
ياما ادي وما كَلشِ
حبيبي وصاحبي ورفيقي
وحشني
هزارك وعصبيتك بدون اسباب
وحشنا اللمة ف وجودك جامع احباب
وحشني اجبلك العدة وانولك منها كام مفتاح
عشان هتصلح المكسور
مكنش ف بالي أن العمر مش هيطُول
الكلام مش هيخلص لينا تاني
قعاد كتير
ف حكاوي محوشاها
هاجي اغلس واحكيهالك
بالمناسبة
لسه بدفي بشالك
حيطان بيتنا لسها بتنشع حنانك
ف سلام الله ياصاحبي وف نعيمه
وابقي زورني المنام
انت عارف اني مستنيا اشوفك من زمان
يجعل لقانا نصيب
يابو ضحكة صافية معمرة ف قلبي
يا صاين العشرة والود والكلمة
سبت لولادك سيرتك الحلوة
طول عمرك ساند ضهرنا
عيشت حبيبي
عيشت وهتفضل وسطنا

شاهد أيضاً

العمل المدمر..قصة “خالد فخر الدين”

ما ان خُطت كلمة النهاية، و قفز القلم متحررا من قبضة ألبرت حتى أخذ هذا …

تالنت كيدز و فويس باند تقيم اول حفل غنائي اون لاين اليوم

كتب _ خالد حماده:-   تحت ضيافه ” ذا رووم” اقيمت اليوم الحفل الغنائي الاول …

فرقه تالنت كيدز تستعد لحفل اون لاين بقيادة المايسترو اسلام جاد 

كتب _ خالد حمادة :-    تحيي لاول مرة أكاديمية تالنت كيدز بقيادة اسلام جاد …

ابيات شعرية بعنوان “اجمل صورة”

كتب _ احمد سلامه :-   يااجمل صورة شافتها عينى فى حاجات كبيرة ببنك وبينى …

ابيات شعرية بعنوان “ذرينى اقولها”

كتب _ احمد سلامه :- كيف اقول احبك والحب معنى لاسمك كيف اقول احبك وكل …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *